Nga e hëna territoret tona do të jenë nën ndikimin e masave më stabile anticiklonike që do të kushtëzojnë mot shumë më stabil dhe me shumë rreze diellore. Po ashtu edhe temperaturat do të shënojnë rritje të ndjeshme.
Rritja e temperaturave do të jetë progresive, pra e përditshme deri të premtën kur priten dita më e nxehtë e javës. Temperaturat fillimisht do të rriten mbi 25 gradë Celsius në viset kontinentale në Kosovë, ndërsa në Shqipëri ato do të shkojnë menjëherë 30 ose mbi 30 gradë Celsius. Me kalimin e ditëve të javës në tërë rajonin do të kemi temperatura deri në 30 gradë Celsius, ndërsa të enjten dhe të premten mund të kemi tejkalimin e kësaj vlere edhe në Kosovë.
Duke mos përjashtuar rrebeshin e izoluar gjatë mesjavës, sipas ecurive aktuale sinoptike destabilizim të atmosferës pritet të kemi vonë të premtën ose më së largu të shtunën kur do të kemi rrebeshe lokalisht të fuqishme shiu me vetëtima dhe bubullimë.
Fundjava e ardhshme do të jetë paksa më e freskët dhe me mundësi për rrebeshe lokale shiu me vetëtima dhe bubullimë./METEOBALLKAN
