Për shkak të shpyllëzimit për qëllime bujqësore dhe përdorimit të pesticideve në kulturat bujqësore, bleta e mjaltit, e njohur edhe si bleta e specieve Apis mellifera, është duke u shfarosur.
Prodhuesit lokalë, të vendosur në zonën Belterra, në Brazil, kanë raportuar këtë situatë të tmerrshme në kanalin e lajmeve BBC Brazil. Ata vazhdimisht gjejnë bletë të vdekura në pronën e tyre.
Ndërkaq ekspertët besojnë se prapa gjithë kësaj qëndron përdorimi i tepërt i pesticideve, në veçanti disa lloje që janë rreptësisht të ndaluara në vendet anëtare të Bashkimit Evropian.
Bletët nuk iu rezistojnë kimikaleve siç është fipronili dhe neonikotinoidi, e pikërisht këto substanca BE-ja i ka ndaluar në vitin 2018, e po të njëjtin vit presidenti brazilian Jair Bolsonaro kishte shfuqizuar ligjin që ndalon përdorimin e këtyre pesticideve.
Efektet negative të përdorimit të pseticideve prekin edhe te kafshët, ndikojnë te flora dhe madje edhe shëndeti i banorëve që jetojnë në një vendbanim afër Amazon.
Tani kosheret janë bosh, thotë João do Mel, një prodhues mjalti, i cili pasi kishte 1000 koshere, tani ka vetëm 100 koshere. Prej tyre, ai merrte përafërsisht 5 deri në 6 kilogram mjaltë në javë.
Përdorimi i pesticideve është rritur dukshëm gjatë viteve të fundit në Brazil, kurse 193 prodhues të ndryshëm përmbajnë kimikale që janë të ndaluara në vendet tjera apo në ato që janë anëtare të BE-së.
