Të paktën 36 persona mbetën të vdekur dhe më shumë se 85 u plagosën kur një tren pasagjerësh që transportonte më shumë se 350 persona u përplas me një tren mallrash pak para mesnatës në Tempi të Greqisë qendrore pranë qytetit të Larisës, njoftoi shërbimi grek i zjarrfikësve. Shkaku i aksidentit më vdekjeprurës të trenit në Greqi në dekada mendohet të jetë një gabim njerëzor.
Duke folur për ERT-në për aksidentin tragjik, kryetari i Federatës së Hekurudhave, Janis Dicas, tha se besonte se ishte një gabim njerëzor dhe se shpresonte që ky të ishte aksidenti i fundit i tillë.
Ai theksoi se i vetmi ngushëllim është se nuk ka ndodhur brenda tuneleve që ishin aty pranë.
Deri më tani autoritetet greke kanë arrestuar katër persona në lidhje me përplasjen fatale dhe hetimet janë ende në vijim.
Shumica e viktimave raportohet të jenë studentë.