Siç po e shohim të gjithë Evropa perëndimore po përballët me valën më të fuqishme të nxehtësisë ndoshta në histori, por fatmirësisht ne po përjetojmë temperatura kryesisht normale verore deri më tani me përjashtim të disa viseve të Shqipërisë të cilat ishin mjaft të nxehta disa ditë me radhë.
Temperaturat nga sot e nesër do të shënojnë ngritje edhe tek ne në Kosovë, Shqipëri, Maqedoninë e Veriut, Mal të Zi etj, por nuk pritet nxehtësi ekstreme sikur në Evropë sepse rajoni ynë gjendet në periferi të mases së nxehtë ajrore ekstreme afrikane.
Problem ditëve të ardhshme dhe në fundjavë do të jetë lagështia e ajrit e cila do të shënojë rritje dhe kjo do ta bëjë të nxehtit më të vështirë për ta përballuar. Të shtunën pasdite në Kosovë priten rrebeshe lokale shiu me vetëtima dhe bubullimë, por reshjet nuk do të jenë gjithëpërfshirëse.
Natën mes së dielës dhe së hënës Mali i Zi do të përfshihet nga stuhi të fuqishme verore me rrebeshe të fuqishme shiu me vetëtima dhe bubullimë. Stuhia parashihet të përfshijë edhe Shqipërinë Veriore dhe vende-vende edhe pjesë tjera të rajonit tonë./Meteoballkan
