Inspektorati i Komunës së Shtimes ka realizuar një aksion për kontrollimin e pishinave, të cilat gjatë periudhës së fundit kohore po frekuentohen mjaft shumë nga qytetarët shkaku i temperaturave të larta.
Ndërkaq këtyre bizneseve rekreacioni i janë dhënë një varg rekomandimesh, të cilat janë plotësuar brenda një afati të shkurtër, shkruan sot Koha Ditore.
Zyrtarët komunalë në Shtime kanë thënë se pishinat me urgjencë kanë plotësuat kriteret kryesore në mënyrë që të pajisen me raporte nga Instituti i shëndetit publik për analizat e ujit mikrologjike, bakteriologjike, kimike dhe fizike, pastaj punëtorët dhe stafi i kuzhinierëve janë pajisur me libreza sanitare.
Po ashtu, Inspektorati ka obliguar që pishinat të kenë edhe staf mjekësor dhe infermierë, zhytës të mjaftueshëm dhe adekuat sipas ligjit etj.
Gazmend Kadriu, përfaqësues i një pishine në qytetin e Shtimes, ka thënë se për herë të parë në Kosovë nga paslufta e kanë regjistruar një biznes të tillë, ndërkohë për çdo vit i plotësojnë të gjitha kriteret duke u nisur nga cilësia e ujit, cilësia e ushqimit, siguria e qytetarëve dhe shërbimet e tjera moderne.
