MeteoBallkan po hyn në një fazë të re të angazhimit. Janë bërë tre vite punë e palodhshme që nga themelimi, prandaj është koha që për lexuesit e ndjekësit të prezantohet dizajni ri i uebsajtit, i cili do të ndihmojë mijëra lexues të përditshëm që të kenë qasje më të lehtë e përvojë më të mirë përderisa lexojnë artikujt tanë.
Perveç kësaj, prej tani MeteoBallkan i rritë edhe kapacitetet e veta njerëzore në përbërjen e stafit. Përveç Muhamed Berishës, i cili e ka themeluar MeteoBallkanin dhe i cili njihet si pasionant e lexues i dëshmuar i prognozave të parashikimeve meteorologjike duke u bazuar në modelet më të avancuara botërore, stafi i mediumit do të përbëhet edhe nga anëtarë të rinj, me përvojë të respektueshme në gazetari dhe fusha të tjera që mund të japin kontribut në fuqizimin e MeteoBallkan.
Po ashtu, mediumi prej tani në spektrin e vet informativo-promovues do të ketë edhe dy rubrika të reja, atë të turizmit dhe bujqësisë. Lexuesit e interesuar do të kenë mundësi që të gjejnë lajmet e fundit nga këto dy fusha. Nuk do të ngurrojmë të promovojmë turizmin dhe bujqësinë në të gjitha trojet shqiptare. Ne besojmë se turizmi e bujqësia janë dy sektorë të rëndësishëm ekonomikë për Kosovën e Shqipërinë, përkundër se janë lënë pas dore viteve të fundit.
Do të ofrojmë lajme edhe nga bota, me sasi të shtuar, që kanë të bëjnë me parashikimin e motit e fenomenet meteorologjike, si dhe do të vazhdojmë që të publikojmë fotografitë e videot e shumta që i dërgojnë ndjekësit e MeteoBallkanit. Dërgohen aq shumë, saqë shpesh është e vështirë që të përpunohen të gjitha ato për publikim, por ne do të mundohemi që të gjejmë forma kreative për shfaqjen e tyre.
Do të mbetemi të përkushtuar dhe të vendosur në misionin tonë që të informojmë saktë dhe shpejtë mbi parashikimin e motit, por më shumë do të kujdesemi që të jemi të saktë se sa të shpejtë. Ne e kuptojmë natyrën e parashikimit që shpesh mund të jetë i vështirë edhe për institutet më të avancuara meteorologjike në botë, por përpjekja për saktësi e korrektësi do të jetë maksimale.
Do të jemi të hapur për të gjithë njerëzit, institucionet, institutet e kompanitë që duan bashkëpunim të çfarëdoshëm me ne. Qëllimi ynë përfundimtar është informimi, promovimi i vendit tonë, e trajtimi i fenomeneve të ndryshme meteorologjike.
Falënderimi për sukseset e deritanishme u takon mijëra lexuesve dhe përkrahësve të shumtë që e kanë mbështetur pa rezervë MeteoBallkanin gjatë këtyre viteve. Do të jemi bashkë edhe në të ardhmen!
