Aty ku kishte një kupolë akulli, tash mund të shihet ngjyra kafe e tokës. Bora e shkrirë dhe akulli kanë krijuar pellgje uji. Këto janë efektet e rritjes rekord të temperaturava në Antarktikë, sipas NASA-s. Këto pamje satelitore NASA i ka publikuar të premten nga pjesa veriore e gadishullit të Antarktikës.
Fotografitë satelitore janë kapur mes datave 4 dhe 13 shkurt. Dy ditë pas realizimit të fotografisë së parë, temperaturat në Antarktikë kanë arritur deri në 18.3 gradë Celsius, njësoj sikur temperaturat në Los Angeles gjatë asaj dite, ka vënë në theks NASA.
“Nxehtësi kaq persistente nuk ka qenë tipike për Antarktikën deri në shekullin 21, por është bërë më e zakonshme në vitet e fundit”, thuhet në njoftimin e NASA-s.
“Nuk kam parë që shkrirja e akullit të krijojë pellgje kaq shpejtë në Antarktikë”, ka thënë Mauri Pelto, studiues i akullit dhe borës.
Ky ritëm i ngrohjes së gadishullit po shihet me shqetësim nga kolektivi i shkencëtarëve, ngase imponon ndryshime gjeografike dhe atmosferike në planet, të cilat mund të kenë ndikim të drejtpërdrejt në jetën e njerëzve në pjesë të ndryshme të botës. /MeteoBallkan/
