Në moshën 63-vjecare u bë magjistër i bletarisë, por me kultivimin e bletëve merret prej një kohe të gjatë.
Ky është bletari Zymer Bajraktari, 67-vjecar nga Komuna e Skenderajt.
Në fshatin Klinë e Epërme, ai ka rreth 86 ari tokë të cilën e ka shndërruar në Qendrën kryesore për Kultivimin e Ëmave.
Sipas Bajraktarit, dëshira për ta njohur bletën si insekt specifik e shtyu të magjistrojë në bletari.
Të ndodhet në mes kosheresh e ka me dëshirë, sepse siç shprehet vetëm aty mund të flasë në thelb për familjen e bletës, insektit më të zgjuar.
Përkushtimi ndaj bletës e ushqimi që i servohet do të thotë nxjerrje e produktit më cilësor.
Nisur nga kjo, bletari nga Skenderaj ka mbjellë shelgje rreth bletishtes. Sipas tij, poleni i luleve të tyre shërben si ushqim bletësh në stinën e pranverës.
T’i kontrollojë një nga një bletët i duhet ta bëjë çdoherë. E këtë bën duke hapur me radhë kosheret për të parë zhvillimin e bletëve.
Krejt afër bletishtes, 67-vjeçari ka ndërtuar dhoma të veçanta për përpunimin e mjaltit. Janë tri lloje mjalti që ai shet e për secilin tregon disa veti kuruese.
Se a ka rrezik apo jo pickimi i bletës është pyetja që pashmangshëm i bëhet Bajraktarit, për të cilën ka një përgjigje.
Një hapësirë të vogël e ka krijuar edhe për laboratorin për të nxjerrë qumështin e bletës.
Një veprimtari të tillë ai thotë se e bën tash e 20 vjet.
