Kjo javë do të karakterizohet me mot mjaft të ngrohtë dhe të nxehtë, me temperatura që do të arrijnë edhe në Kosovë deri në 30 gradë Celsius, madje mund të ndodhë edhe deri në 31 gradë Celsius.
Megjithatë, atmosfera nuk do të jetë tërësisht stabile, ngase nganjëherë parashihen zhvillime të fuqishme konvektive dhe me rritjen e temperaturave ditore këto zhvillime mund të kushtëzojnë ndonjë stuhi të fuqishme lokale dhe rrebeshe intensive të karakterit lokal, por në përgjithësi mot më stabil do të jetë dominant gjatë javës.
Nja masë mjaft e fuqishme ajrore anticiklonike me origjinë nga Afrika veriperëndimore e veriore është shtrirë në Evropes jugperëndimore dhe perëndimore me temperatura mjaft të larta verore dhe periferia e kësaj mase të ngrohtë ajrore po shkakton rritje të temperaturave edhe në viset tona.
E hëna po shënon stabilizim të plotë të atmosferës dhe rritje të theksuar të temperaturave krahasuar me ditët paraprake.
Të martën do të jetë edhe më nxehtë, por pasdite priten disa zhvillime të karakterit të izoluar dhe si pasojë parashihen rrebeshe të izoluara shiu me vetëtima dhe bubullimë në pjesë të Kosovës, Shqipërisë dhe Maqedonisë së Veriut. Temperaturat maksimale mund të “prekin” 30-shin e parë edhe në Kosovë dhe atë në Dukagjin.
Mjaft nxehtë parashihet të jetë edhe të mërkurën në atmosferë festive dhe temperatura që do të arrijnë nga 27 deri në 30 gradë Celsius edhe në Kosovë. Sigurisht në disa vise të Shqipërisë dhe Maqedonisë së Veriut mund të jetë edhe më nxehtë.
Të entjen , ende nxehtë, por me depërtimin e një sasie pak më të madhe jo-stabile ajrore mund të ketë destabilizim më të fuqishëm të atmosferës me mundësi që orët e pasdites të ketë shtrëngata shiu me vetëtima dhe bubullimë. Temperaturat do të fillojnë të ulën sidomos me zhvillimin e shtrëngatave eventuale orëve të pasdites.
Dita e Premte sipas parashikimeve aktuale parashihet të jetë më e freskët, por me stabilizim të atmosferës pas rrebesheve eventuale të së enjtes. Temperaturat normalisht do të jenë pak më të ulëta, por reshje më nuk priten.
Fundjava vjen me stabilitet atmosferik të shtunën dhe me rritje të temperaturave, ndërsa të dileln pasdite përsëri mund të ketë zhvillime të rrebesheve të izoluara të shiut me vetëtima dhe bubullimë.
Pra, kemi hyrë në sezonen verore shumë shpejt pas ditëve mjaft të ftohta sidomos në Kosovë.
Kjo javë do të jetë “hyrje” për stinën e verës dhe priten periudha të gjata me diell. Zhvillime të ndonjë rrebeshi ose stuhie të izoluar presim të martën pasdite, të mërkurën e sidomos të enjten kur mund të jenë më të fuqishme dhe më të përhapura, pastaj të dielën pasdite më të dobëta.
Ishte ky parashikimi i motit për këtë javë. Ndryshime në parashikim mund të ketë dhe për çdo ndryshim eventual do të njftoheni në postimet tona të përditshme./MeteoBallkan
