Kjo javë do të karakterizohet me mot mjaft të ndryshueshëm dhe me shumë vranësira për dallim nga java që po e lëmë pas. Gjithashtu priten edhe reshje shiu, herë pas here dhe vende-vende intensive.
Moti do të fillojë të ndryshojë qysh nga dita e parë e javës për shkak të depërtimit të një mase të ftohtë ajrore nga veriu i Kontinetit. Në anën tjetër në brigjet e Afrikës së Veriut, gjegjësisht në Tunizi do të krijohet një ciklon i fuqishëm i cili do të niset në drejtim të Italisë dhe do të stacionohet afër Siçilisë.
Ky ciklon në kombinim me masen e ftohtë dhe të lagësht ajrore do të na sjellë reshje të dendura shiu, të martën në Kosovë, kurse në Shqipëri dhe Maqedoninë Veriore përpos së martes reshje të dendura shiu priten edhe të mërkurën ku lokalisht mund të ketë edhe vërshime. Në viset malore do të ketë edhe reshje bore.
Nga dita e enjte pritet përmirësim gradual i motit dhe përpos vranësirave pritet të kemi edhe intervale kohore me diell dhe rikuperim gradual të temperaturave.
Nga e premta temperaturat do të ngriten dhe moti do të stabilizohet dukshëm, ndërsa fundjava pritet të na sjellë përsëri mot të ngrohtë pranveror.
Ishte ky parashikimi i motit për javën që po hymë me disa fjali të shkurtra dhe nëse ka ndonjë ndryshim eventual do tu njoftojmë në postimet tona të përditshme në MeteoBallkan./Meteoballkan
Imazhi nga : Windy
