Sot në Kosovë pritet të mbajë mot me vranësira të dendura dhe reshje të shpeshta shiu. Vende-vende priten reshje të dendura shiu dhe mund të ketë edhe ndonjë rrebesh me vetëtima dhe bubullimë. Në viset e larta malore do të ketë reshje dëbore.
Temperaturat do të shënojnë ulje të ndjeshme. Minimalja do të zbres deri në 6 gradë Celsius, kurse maksimalja jo më shumë se 11 gradë Celsius.
Në Shqipëri, Maqedoninë Veriore, Luginë të Preshevës dhe Mal të Zi e marta pritet të kushtëzojë mot me vranësira, vende-vende të dendura dhe me reshje të shpeshta lokale shiu, vende-vende rrebeshe intensive me vetëtima, bubullimë dhe breshër.
Temperaturat do të shënojnë ulje të ndejshme në tërë rajonin.
Të mërkurën na pret mot relativisht i ftohtë, me vranësira e erëra të ftohta nga veriu e verilindja. Reshjet e shiut do të jenë të herëpashershme dhe të karakterit lokal. Në Shqipëri rrebeshe lokale shiu me vetëtima dhe bubullimë.
Të enjten pas një mëngjesi të ftohtë dita vijon me stabilizim gradual të atmosferës dhe rritje të temperaturave. Në mëngjes nëse do të jetë tërësisht kthjellët në pjesë të Kosovës mund të ketë ngrica sipërfaqësore dhe të shpresojmë që të ketë vranësira ngase ngricat në këtë kohë edhe të dobëta mund të dëmtojnë pemët në kulmin e lulëzimit./MeteoBallkan
