Për shkak të afrimit të frontit të ftohtë ajror nga veriu i Kontinentit mbrëmë dhe sot kemi pas erëra të forta jugperëndimore në shumë rajone të Republikës së Kosovës.
Edhe pse kemi erëra moti është i nxehtë, por pasdite priten ulje të lehta të temperaturave për shkak të ndikimit të frontit të ftohtë ajror.
Gjithashtu priten edhe zhvillime lokale të vranësirave të cilat do të sjellin rrebeshe të izoluara por të fuqishme shiu me vetëtima, bubullimë dhe mundësi edhe për breshër. Këto zhvillime priten kryesisht në rajonin e Mitrovicës dhe Podujevës, pra në veri dhe verilindje të vendit dhe do të jenë të karakterit lokal, kurse në vise tjera mund të ketë ndonjë rrebesh të izoluar dhe afatshkurtër, por në shumicën e territorit do të mbetet me diell, vranësira të pakta dhe erëra.
Erërat pritet të qetësohen në orët e mbrëmjes sepse atëherë do të kemi depërtimin dhe largimin e frontit të ftohtë dhe në këtë mënyrë pritet stabilizim i menjëhershëm i atmosferës.
Nga nesër (e Mërkurë) na pret mot stabil, me diell, vranësira dhe mjaft i nxehtë. Erëra do të kemi përsëri të premten./Meteoballkan
