Pas kthjellimit të motit në mëngjes dhe paradite vranësirat përsëri kanë mar hov zhvillimi dhe në orët e ardhshme pritien zhvillime të fuqishme të vranësirave konvektive të cilat do të na sjellin rrebeshe lokale shiu me vetëtima dhe bubullimë.
Në disa lokacione priten rrebeshe të fuqishme shiu, vetëtima dhe bubullima masive dhe do të ketë mundësi edhe për breshër.
Rrebeshe shiu me vetëtima dhe bubullimë priten sot lokalisht edhe në Shqipëri dhe Maqedoninë Veriore. Njëkohësisht sot do të kemi edhe depërtimin e frontit të ftohtë i cili do të shkaktojë ulje të ndjeshme të temperaturave. Reshjet lokale mund të vazhdojnë edhe gjatë orëve të mbrëmjes dhe natës, kurse nesër rrebeshe lokale shiu me vetëtima dhe bubullimë priten në Shqipëri dhe Maqedoni. Në Kosove priten vetëm reshje shiu të cilat do të pushojnë por do të jetë mjaft freskët.
Nga e premta reshjet do të pushojnë dy ditë për tu rikthyer përsëri të dielën pasdite vonë.
Përndryshe, temperaturat e larta që mbretëruan ditëve të kaluara e sidomos dje, pastaj depërtimi i një mase ajrore të ftohtë, jostabile dhe ciklonike shkaktuan “shpërthim konvektiv atmosferik” natën e kaluar duke kushtëzuar rrebeshe të fuqishme shiu, shtrëngata të mëdha me vetëtima dhe bubullimë dhe breshër që nuk mbahet mend në trojet tona./Meteoballkan
