Rajoni ynë ende mbetet nën ndikimin e masave të ngrohta ajrore me origjinë nga Afrika veriore dhe Mesdheu, mirëpo temperaturat kanë shënuar ulje të lehta për shkak të ciklonit nga Atlantiku (I zhvendosur në Adriatik dhe tani në Evropn lindore) i cili na solli stuhi dhe rrebeshe shiu. Këto fusha ajrore ciklonike do të vazhdojnë të kenë ndikim të madh edhe dy tri ditët e ardhshme para mbërritjes së acarit kontinental siberik. Do të kemi ende porcione të reshjeve të shiu dhe rrebesheve si dhe erëra herë pas here dhe vende-vende të fuqishme nga jugu dhe jugperëndimi.
Me ardhjen e acarit siberik nga e enjta ose e premta do të fillojnë të fryjnë erëra të acarta veriore për shkak të anticiklonit të fuqishëm skandinav dhe cikloneve në lindje.
Ne entuziastët e reshjeve të borës ende jemi “nën ethe” për shkak të mungesës së një cikloni mirë të definuar, megjithatë reshjet (kalimtare) e borës nuk do të mungojnë por mbetet ende mjaft enigmatike sasia e dëborës dhe se a do të jetë gjithëpërfshirëse pikërisht për shkak të mungesës eventuale të ciklonit i cili në kontakt me ajrin e ftohtë siberik do të na sillte reshje bore. Kjo mbetet të sqarohet dhe definohet ditëve të ardhshme ndërsa gjendja aktuale sinoptike favorizon reshje dëbore edhe në zonat më të thella bregdetare të Shqipërisë duke përfshirë edhe kryeqendrën shqiptare Tiranën.
Sidoqoftë ende asgjë nuk është krejtësisht e sqaruar dhe ne presim përditësimet e simulimeve të modeleve më të sakta globale për parashikim të motit dhe do ju njoftojmë me kohë për të rejat më të fundit./Meteoballkan
