Edhe nesër rajoni ynë do të jetë nën ndikimin e masave ajrore të nxehta me origjinë nga Afrika Veriore. Kjo nënkupton se edhe nesër temperaturat do të jenë mbi mesatarën e paraparë për këtë kohë.
Pas një mëngjesi të ftohtë dhe vende vende me mjegull nesër në Kosovë, Shqipëri dhe Maqedoni do të mbajë mot mjaft i këndshëm, stabil dhe me diell. Do të fryjë erë e lehtë deri mesatare nga juglindja.
Nga e Mërkura pritet gradualisht që të kemi ndryshim të motit por pa reshje. Ndryshimi do të jetë tek temperaturat të cilat do të fillojnë të shënojnë ulje graduale. Nga Siberia një masë ajrore do të depërtojë në drejtim të Turqisë, Rumanisë, Bullgarisë dhe Greqisë duke përfshirë edhe rajonin tonë.
Në Turqi dhe shtetet tjera të lartëpërmendura do të kemi reshje të dendura shiu dhe bore varësisht nga lartësia mbidetare kurse në Kosovë bora e parë mund të ndodhë që të vije me datën 19 Nëntor. Sipas ecurive aktuale reshje shiu nuk pritet të ketë sepse temperaturat do të ulën dukshëm para ardhjes së të reshurave atmosferike dhe në këtë mënyrë reshjet do të fillojnë si reshje bore. Megjithatë kjo nuk është ende e sigurtë dhe mundësitë për ndryshime ekzistojnë ende sepse kemi edhe shumë ditë përpara. Ajo çka është e sigurtë janë ulja e temperaturave nën vlerat mesatare por kjo do të ndodhë në mënyrë graduale kurse reshjet atmosferike ende nuk janë shumë të sigurta dhe për tu siguruar duhet pritur edhe ndonjë ditë. /Meteoballkan.
