Rënja e temperaturave këto ditë vjen si pasojë e ardhjes së ajrit të ftohtë me origjinë polare dhe duket sikur mund ti themi lamtumirë temperaturave verore, por në fakt nuk është ashtu siç duket ngase Afrika Veriore ende do të vazhdojë “të drejtojë antenat” në drejtim të rajonit tonë këtë fillim-vjeshte.
Pas uljes së ndjeshme të temperaturave ku gjatë natës së sontme, eventualisht edhe nesër mund të kemi edhe fjollat e para të dëborës në majat më të larta të disa bjeshkëve tona. Këto fjolla do të jenë të dobëta, sporadike dhe afatshkurtra. Në viset tjera pritet mot i freskët, me vranësira dhe në ndonjë rajon me riga të dobëta afatshkurtra shiu.
Nga e premta pritet përmirësim i motit ndërsa gjatë fundjavës priten rritje të ndjeshme të temperaturave dhe rajoni ynë do të ndikohet përsëri nga masat e nxehta ajrore me origjinë nga Afrika veriore të cilat na vijnë nga Evropa perëndimore. Temperaturat maksimale në Kosovë përsëri mund të arrijë deri në 29 madje deri në 30 gradë Celsius. Ngjashëm pritet të jetë edhe në Shqipëri, Maqedoninë Veriore dhe më gjerë në rajon./Meteoballkan