Kjo javë pritet të jetë më e ftohta deri më tani gjatë kësaj sezone për shkak të gjendjes ideale sinoptike për ardhjen e ajrit mjaft të ftohtë polar nga verilindja e Kontientit. Cikloni është ende aktiv në Greqi dhe pasta do ti drejtohet Turqisë duke shkaktuar stuhi të fuqishme shiu e bore atje. Njëkohësisht nga Evropa na vijnë masa të thata ajrore anticiklonike nga një anticiklon mjaft i fuqishëm i cili shtrihet nga Britania e Madhe në Atlantik, në Skandinavi dhe Siberi. Kjo gjendje sinoptike mundëson ardhjen e ajrit mjaft të ftohtë polar në rajonin tonë.
Edhe nesër (e martë) priten reshje lokalole në Kosovë, veriun e Malit të Zi si dhe disa vise të Shqipërisë, Maqedonisë së Veriut dhe Luginës së Preshevës, por reshjet do të vijnë duke u izoluar gjithnjë e më shumë në hapësira më të ngushta gjeografike.
Gjatë mesjavës pritet stabilizim i motit, por pritet acar polar.
Nga e mërkura kryesisht na pret mot i thatë në tërë rajonin tonë , me përjashtim të disa viseve kontinentale ku ende mund të kemi fjolla të herëpashershme bore. Temperaturat do të ulen dukshëm dhe me kthjellimin e motit rriten edhe gjasat për acar të fortë. Mëngjeset më të ftohta pritet të jenë mëngjesi i së mërkurës dhe së enjtës, me temperatura nën -10 gradë Celsius. Madje në viset malore temperaturat minimale mund të ulen deri në -18 gradë Celsius.
Zbutja graduale e acarit polar bazuar sipac ecurive aktuale sinoptike pritet të fillojë nga e premta kur priten rritje të temperaturave. Ende priten ngrica por do të jenë më të lehta, ndërsa temperaturat maksimale pritet të arrijnë deri afërsisht 5 ose 6 gradë Celsius. Afër fundjavës ka gjasa që të ketë edhe mjegull. Nëse do të kemi krijimin e mjegullnajave atëherë i ftohti mund të “ngujohet” në ato rajone ku eventualisht pritet krijimi i mjegullnajave dhe kjo mund të pengojë rritjen e temperaturave në siperfaqen e tokës (në ato rajone ku ka mjegull) edhe nëse kemi rritje të temperaturave në shtresa më të larta të atmosferës.
Pra, shkurtimisht: pas reshjeve të borës dhe erërave të ftohta veriore, pason kthjellimi gradual i motit në mesjavë dhe ulja e mëtutjeshme e temperatuave. Të paktën dy mëngjese pritet acar mjaft i ftohtë, ndërsa rritje graduale të temperaturave mund të kemi nga e premta./MeteoBallkan
