Kjo fundjavë sipas të gjitha gjasa pritet të na sjellë reshjet e shumëpritura të shiu në viset tona dhe normalisht reshjet nuk do të jenë të balancuara ngase kemi të bëjmë me reshje tipike pranveore dhe verore. Sidoqoftë shumica absolute e territoreve tona pritet të përfitojnë reshje shiu dhe përderisa në shumë zona priten rrebeshe intensive, në zona të tjera rrebeshe më të pakta dhe është jashtëzakonisht e vështirë për të mos thënë e pamundur që të përcaktohet saktë lokacioni i reshjeve të mëdha.
Predispozita shumë të larta për reshje intensive kanë viset kodrinore-malore por edhe ultësirat e viseve tona kontinentale. Priten edhe intervale kohore me diell dhe zhvillime të fuqishme të vranësirave.
Parametrat meteorologjik parashohin edhe zhvillime mjaft të fuqishme konvektive që mund të krijojë struktura jashtëzakonisht interesante të vranësirave Cumulonimbus dhe Shelf që janë vranësira të stuhive. Këto parametra parashihen në disa vise të Kosoves si në juglindje dhe verilindje të vendit si dhe në Maqedoninë Veriore e sidomos përreth rajonit të Shkupit, por këto mund të ndodhin lokalisht në çdo pjesë të territorit. Madje nuk përjashtohet mundësia që të kemi edhe struktura tornadike.
Pra, para nesh një fundjavë me rrebeshe lokale shiu me vetëtima dhe bubullima masive si dhe me mundësi për ndonjë stuhi të izoluar me breshër dhe erëra të fuqishme. Në përgjithësi reshjet do të jenë jashtëzakonisht të mirëseardhura dhe të shpresojmë që moti i ashpër të jetë në hapësira sa më të kufizuara.
Të dielen rrebeshe lokale priten edhe në bregdetin shqiptar.
Reshjet do të jenë më të koncentruara në orët e pasdites dhe mbrëmjes. Në fund vlenë të përmendet se nga mesi i javës së ardhshme na pret vala e parë serioze e nxehtësisë verore./MeteoBallkan
