Një fronti i fuqishëm i ftohtë ajror po shkakton stuhi të fuqishme në vendet fqinje veriore e veriperëndimore. Kjo masë ajrore mjaft jo-stabile do të depërtojë edhe në viset tona, por më e dobësuar në vendet fqinje.
Si pasojë sot e hënë vetëm në veri të Kosovës priten rrebeshe lokale shiu me vetëtima dhe bubullimë, kurse të martën masa ajrore jo-stabile do të depërtojë më në jug duke destabilizuar atmosferën në shumë pjesë të Kosovës, pjesë të Maqedonisë së Veriut dhe Shqipërisë.
E Hënë: diell e vranësira, por kryesisht thatë. Në veri dhe verilindje të Kosovës priten rrebeshe të izoluara shiu me vetëtima dhe bubullimë.
E MARTË: diell dhe vranësira dhe zhvillime të vranësirave konvektive me mundësi për rrebeshe lokale shiu me vetëtima dhe bubullimë në shumë pjesë të Kosovës, disa pjesë të Maqedonisë së Veriut e Shqipërisë dhe sidomos në veri të Malit të Zi. Ndonjë rrebesh pritet edhe në Luginë të Preshevës. Temperaturat do të pësojnë ulje, por jo të theksuara. Në bregdet me diell dhe pa reshje.
E Mërkurë: Ditë jo-stabile, me periudha me diell dhe zhvillime të vranësirave edhe ato konvektive të cilat do të kushtëzojnë rrebeshe lokale shiu me vetëtima dhe bubullimë. Të gjitha këto reshje do të jenë të karakterit lokal, pra diku priten rrebeshe intensive e diku tjetër jo shumë larg vetëm riga e diku asnjë pikë.
E Enjte vranësira e diell, atmosfera me tendencë stabilizimi, por mund të ketë ndonjë rigë shiu ose rrebesh lokal. ndërkohë që fillon të fuqizohet ndikimi anticiklonik dhe dobësohet masa ajrore jo-stabile.
E Premte: me fuqizimin e masave ajrore anticiklonike vjen deri te stabilizimi i plotë i atmosferës dhe rritja e temperaturave.
Fundjava do të jetë mjaft e nxehtë, stabile dhe me diell.
Pra, mot dinamik gjatë kësaj jave ku do të përjetojmë të gjitha ngapak si nxehtësinë dhe rrebeshet lokale verore me vetëtima dhe bubullimë, tipike për verën e hershme.
Ditët më jo-stabile pritet të jenë e martja dhe e mërkura, kurse ditët tjera do të jenë kryesisht stabile sidomos nga e Premtja dhe fundjava.
Temperaturat në Kosovë nuk do të ndryshojnë shumë përpos momenteve të stuhive lokale kur ato pësojnë ulje afatshkurtër për shkak të reshjeve dhe erërave eventuale. Në përgjithësi minimalja pritet të zbres deri në 14 gradë Celsius, kurse maksimalja do të shkojë mbi 30 gradë Celsius.
Pra edhe njëherë: e hëna dhe entja me ndonjë reshje të izoluar, e marta dhe e mërkura me zhvillime më të fuqishme konvektive, kursec e Premtja dhe fundjava stabile dhe me mot mjaft të nxehtë veror.
Në Shqipërinë bregdetare gjatë tërë javës pritet mot me diell dhe i nxehtë.
Ishte ky parashikimi i motit për këtë javë. Ndryshime në parashikim mund të ketë dhe për çdo ndryshim eventual do të njoftoheni me kohë në postimet tona të përditshme./MeteoBallkan
