Pas stuhive dhe shirave të mesdites dhe pasdites atmosfera u stabilizua përkohësisht për të vazhduar me instabilitete të izoluara në orët e mbrëmjes. Rrebeshe dhe stuhi shiu pati në shumë vise të Shqipërisë, Kosoves, Malit të Zi, Maqedonisë së Veriut dhe më gjerë në rajon.
Mot i ngjashëm do të vazhdojë edhe ditëve të ardhshme, ndërsa gjatë ditës së enjte energjia kryesore e instabiliteteve atmosferike pritet të jetë në Shqipëri dhe jug të Malit të Zi ku priten rrebeshe dhe shtrëngata të fuqishme shiu me vetëtima dhe bubullimë. Rrebeshe lokale shiu të enjtën priten edhe në Maqedoninë Veriore dhe normalisht vende-vende edhe në Republikën e Kosoves, por në Kosovë stuhitë kanë tendenca të jenë më të izoluara.
Të premtën qendra ciklonike pritet të arrijë në jug të Detit Adriatik, Detin Jon dhe do të rrugëtojë në drejtim të Greqisë dhe për këtë arsye pritet të ketë intensifikim të reshjeve dhe rrebesheve të shiut në të gjitha territoret tona.
Nga fundjava reshjet pritet të pushojnë në bregdet, por do të vazhdojnë në viset kontinentale herë pas here në formë të rigave të shiut dhe rrebesheve lokale me vetëtima dhe bubullimë. Edhe gjatë këtyre ditëve nuk përjashtohet mundësia që disa stuhi të sjellin edhe breshër./MeteoBallkan