Fronti i ftohtë ajror i cili pritet të shkaktojë destabilizim të fuqishëm të motit po afrohet në drejtim të territoreve tona. Në këto çaste disa sisteme të fuqishme stuhish gjendet në detin e hapur mes Italisë dhe Shqipërisë. Këto vranësira konvektive pritet të përfshijnë Shqipërinë gradualisht. Në anën tjetër vranësirat e shiut (së bashku me temperatura të ulëta) të cilat gjenden në Kontinent në këto çaste kanë arritur deri në Bosnjë dhe Hercegovinë dhe Serbinë jugperëndimore.
Në vazhdim të ditës do të ketë destabilizim të fuqishëm të motit në Shqipëri, me rrebeshe lokalisht të fuqishme shiu me vetëtima dhe bubullim. Ka gjasa edhe për shtrëngata të fuqishme me breshër. Disa sisteme mund të përfshijnë edhe disa vise të Republikës së Kosovës. Reshje shiu priten në tërë territorin e Republikës së Kosovës, por në disa vise priten reshje mjaft të dendura dhe intensive shiu. Sipas hartës meteorologjike reshjet më të dendura priten në jug të Kosovës. Pra, jugu, jugperëndimi dhe juglindja e Kosoves afërsisht deri të pjesët qendrore të vendit pritet të kenë reshjet më të dendura gjatë këtij cikloni.
Reshje shiu sot priten edhe në Kosoven Lindore dhe Mal të Zi, ndërsa reshjet më të fuqishme nga ky ciklon pritet të ndodhin në territorin e Maqedonisë Veriore dhe Greqisë.
Duke u bazuar në hartat meteorologjike në disa vise të Kosovës mund të ketë vërshime, ngase priten sasi të mëdha reshjesh (jug-juglindje-jugperëndim, lokalisht edhe në ndonjë rajon tjetër). Reshje të herëpashershme shiu parashihen edhe gjatë natës, mëngjesit dhe ditës së shtunë, ku herë pas here ende priten intervale reshjesh të dendura shiu sidomos në rajonet e lartëpërmendura.
Nga e diela pritet të kemi stabiliizm gradual të motit, ndërsa nga java e ardhshme priten rritje të temperaturave. Nga java e ardhshme mund të hymë në një periudhë të gjatë pa reshje atmosferike dhe me rritje konstante të temperaturave që mund të shënojë një valë të re nxehtësie verore e cila mund të zgjasë me javë, por kjo mbetet të shihet./MeteoBallkan
