Numri i vdekjeve si pasojë e përmbytjeve në Pakistan vazhdoi të rritet të shtunën, me 57 raste tw reja vdekjesh, 25 prej të cilave viktima fëmijë, ndërsa vendi po përballet me një operacion ndihme dhe shpëtimi në shkallë pothuajse të paprecedentë.
Një organ i nivelit të lartë i krijuar për të koordinuar përpjekjet e ndihmave u mblodh në Islamabad të shtunën për herë të parë, i kryesuar nga kryeministri Shehbaz Sharif, për të vlerësuar katastrofën, raportoi Reuters të shtunën.
Shirat rekord dhe shkrirja e akullnajave në malet veriore sollën përmbytje që kanë prekur 33 milionë njerëz dhe kanë lënë të vdekur të paktën 1.265, përfshirë 441 fëmijë. Përmbytja, e fajësuar për ndryshimet klimatike, është ende duke u përhapur.
Përqindja e vdekjeve të fëmijëve ka ngritur shqetësim. Të premten, Agjencia e Kombeve të Bashkuara për Fëmijët (UNICEF) tha se ekzistonte rreziku i “shumë më shumë” vdekjesh të fëmijëve nga sëmundjet pas përmbytjeve.
Përmbytjet që kanë prekur një të tretën e vendit u paraprinë nga katër valë të nxehti dhe zjarre të shumta pyjore, tha shefi i menaxhimit të fatkeqësive në takimin e nivelit të lartë, duke theksuar efektet e ndryshimit të klimës në vendin e Azisë Jugore.
Zjarret ishin veçanërisht të rënda në provincën jugperëndimore të Balochistanit, duke shkatërruar një pjesë të pyjeve me pisha dhe bimësi të tjera, jo shumë larg zonave tani nën ujë.