Kjo është Marjana Koçeku, blogere, studente ekselente, aktiviste dhe mbi të gjitha malësore, apo më saktë “neomalësore”. Ky është emërtimi që ajo vetë ka zgjedhur për të përshkruar veten dhe për të sjellë dashurinë për rrënjët e saj në botën moderne.
Për të dhënë intervistën për ne, asaj iu desh të ngjitet në mal, për të kapur valë.
Zakonet dhe traditat e vendlindjes së saj, Dukagjinit, e kanë mahnitur gjithmonë Marjanën, që vendosi të nisë një blog për t’ia treguar botës.
E rritur dhe lidhur që në vegjëli me turizmin, pas studimeve, Marjana zgjodhi të rikthehet në shtëpi për të ndërtuar një agroturizëm.
Të restaurosh një kullë, të presësh njerëz, të gatuash, të ofrosh udhëtime dhe guida është diçka që kushton. Nëse me pak financim kjo edhe mund të arrihet vetëm, ka mjaft pengesa që kërkojnë dorën e shtetit. Sepse pa rrugë, turistët nuk kanë si të vijnë.
“Neomalësorja”, edhe pse ka vetëm pak muaj që e ka nisur këtë sipërmarrje, sot numëron vizitorë nga të gjitha vendet e botës, ndër ta shumë anglezë, gjermanë dhe nordikë. Ndaj Marjana i bën thirrje moshatarëve, që para se të ikin larg, të mendojnë edhe se ç’mund të bëjnë në shtëpitë e tyre.
