Reshjet e natës së kaluar fatmirësisht nuk shkaktuan ndonjë problem të madh në rajonin e Kosovës, ndërsa sot reshjet janë ndërprerë dhe ka intervale kohore me diell.
Këto ditë jemi nën ndikimin e masave të fuqishme ajrore ciklonike me qendër mes Skandinavisë dhe Britanisë së Madhe. Këto masa ajrore kanë shtrirë tentakulat e veta deri në Ballkan ku herë pas here pritet krijimi i ciklonit sekondar në Gjirin e Gjenovës së Italisë. Këto masa ajrore ciklonike do të vazhdojnë të sjellin reshje të reja, por më të lokalizuara. Në Kosovë nuk parashihen reshje të mëdha për momentin, por parashihen reshje të lokalizuara në formë të rrebesheve që nuk pritet të zgjasin shumë. Gjendja më problematike mund të jetë në Shqipëri, ngase në disa vise do të vazhdojnë rrebeshet e fuqishme dhe intensive me vetëtima dhe bubullimë edhe gjatë ditëve të ardhshme. Temperaturat nuk pritet të shënojnë ulje për shkak të rrymimeve ajrore nga jugperëndimi dhe ndikimi ciklonik manifestohet edhe me erëra nganjëherë të fuqishme.
Reshje të reja shiu në tërë territoret tona sipas të gjitha gjasave priten për fundjavë./MeteoBallkan
