Dy minatorë që kaluan nëntë ditë të bllokuar në një minierë zinku të shembur të Koresë së Jugut, duke jetuar me kafe të bluar, janë shpëtuar.
Burrat, të moshës 62 dhe 56 vjeç, mësohet se ata janë në gjendje stabile, raportoi BBC.
Dy minatorët u bllokuan gati 200 metra nën tokë pasi një pjesë e minierës së zinkut ku po punonin u shemb më 26 tetor në Bonghwa, në lindje të vendit.
Ata më në fund u shpëtuan natën e 4 nëntorit – më shumë se nëntë ditë pasi filloi sprova e tyre. Të dy mundën të dilnin nga miniera dhe u dërguan në një spital lokal. Mjeku tha se ata do ta merrnin veten plotësisht.
Autoritetet thanë se minatorët mbijetuan duke pirë ujë që ra nga tavani dhe duke përdorur kafen e bluar si vakt ushqimi.
