Gjatë tërë kësaj jave do të kemi rrymime të forta ajrore nga jugperëndimi dhe kjo nënkupton mot më i ngrohtë se zakonisht për këtë periudhë kohore. Përjashtim do të jetë dita e fundit e fundjavës kur përkohësisht do të kemi rrymime ajrore nga veriu dhe mundësi për reshje shiu të cilat shkurtimisht mund të shndërrohen edhe në borë në disa rajone kontinentale.
Të mërkurën na pret mot me diell dhe vranësira dhe me fuqizim të erërave jugperëndimore. Erërat më të forta priten të enjtën ku në disa vise kryesisht malore mund të arrijnë shpejtësinë deri në 70km/h. Reshjet do të jenë kryesisht të pakta dhe të karakterit lokal, ndërsa temperaturat në rritje progresive.
Të premtën do të kemi afrimin ose ndikimin e një cikloni të fuqishëm nga veriperëndimi i Kontinentit dhe si pasojë do të kemi reshje shiu në gati tërë territorin ku vende-vende do të ketë gjasa për reshje më intensive shiu, ndërsa po ashtu do të ketë gjasa edhe rrebeshe lokale me vetëtima dhe bubullimë. Bubullima më masive priten në Shqipëri. Në pjesët qendrore dhe veriperëndimore të Shqipërisë mund të ketë reshje mjaft intensive.
Të shtunën na pret mot me vranësira dhe intervale kohore me diell e reshje të pakta të karakterit lokal, ndërsa të dielën pritet të kemi një tjetër ciklon i përcjellur me një front të ftohtë nga veriu i Kontinentit. Si pasojë priten reshje kalimtare shiu dhe ulje e temperaturave. Në viset kodrinore-malore reshje bore. Ka gjasa që reshje bore të ketë edhe në disa zona më të ulëta mbidetare.
Për fund:
Pra, deri të premten relativisht ngrohtë me erëra jugore e jugperëndimore, vranësira e intervale kohore me diell, të premten më qetë nga erërat, por me reshje shiu lokalisht intensive, të shtunën reshje të pakta lokale dhe të dielën ulje e temperaturave me reshje të reja shiu e në disa zona edhe bore.
Temperaturat në Kosovë nga 0 deri në 17 gradë Celsius e në viset mesdhetare (Shqipëri-Mal i Zi) në orët e intervaleve me diell edhe më ngrohtë deri në 22 gradë Celsius./MeteoBallkan