Edhe sot atmosfera në territorin e Kosovës do të jetë mjaft jo-stabile për shkak të masave ajrore të paqëndrueshme që për një kohë të gjatë janë prezente në rajonin tonë.
Përpos kësaj do të kemi edhe depërtimin e frontit të ftohtë ajror nga veriu dhe veriperëndimi që do të shkaktojë destabilizim edhe më të fuqishëm të atmosferës edhe ashtu e paqëndrueshme.
Si pasojë ekziston potencial ose gjasa për krijimin e disa stuhive të fuqishme orëve të pasdites dhe mbrëmjes me rrebeshe intensive, shkarkesa po ashtu intensive atmosferike dhe erëra mjaft të fuqishme në zonat e shtrëngatave eventuale por edhe më gjerë me depërtimin e frontit të ftohtë.
Disa zona edhe sot apo sonte mund të preken nga reshje mjaft intensive për një kohë të shkurtër që mund të shkaktojnë vërshime të reja të shpejta, prandaj apelohet për kujdes të madh edhe sonte për shkak të sasisë së madhe të reshjeve, erërave dhe bubullimave eventuale. Po ashtu kujdes shumë të madh duhet pasur edhe në komunikacion. Reshjet e mëdha do të jenë të karakterit krejtësisht lokale, por mund të prekim disa zona sonte të cilat është e e pamundur të dihet me saktësi të plotë.
Rrebeshe intensive lokalisht priten edhe në Mal të Zi, veri dhe verilindje të Shqipërisë dhe disa zona në Maqedoninë Veriore.
Me kalimin e sistemeve frontale sonte dhe sistemeve të vranësirave të shiut do të pasojë stabilizimi i motit dhe kjo do të jetë hyrje në njË periudhë të gjatë me mot stabil veror, prandaj vetëm edhe sonte kujdes nga stuhitë dhe reshjet, ndërsa gjatë javës së re do të ketë paralajmërime për kujdes nga nxehtësia e fortë verore./METEOBALLKAN
