Cikloni Gjenovian dhe fronti i ftohtë ajror sollën reshje lokale, ulje të temperaturave duke i dhënë fund valës së fortë të nxehtësisë verore. Reshjet e shiut sollën freski në tërë rajonin dhe vende-vende pati reshje të dendura. Në shumë vise reshjet ishin kalimtare dhe kryesisht të pakta.
Një front të ri të ftohtë ajror pritet të kemi sonte me reshje të reja shiu e rrebeshe lokale, por jo në tërë rajonin. Reshjet do të jenë më të shumta dhe më të shpeshta në shumë zona të Kosovës, Malit të Zi dhe disa vise në Maqedoninë Veriore dhe Kosovën lindore. Edhe në disa vise të Shqipërisë edhe sot priten reshje kalimtare, ndërsa atmosfera nga e marta do të ketë tendencë stabilizimi dhe përmirësimi. Temperaturat sonte dhe nesër shënojnë ulje të mëtutjeshme nga fronti i ri i ftohtë ajror sidomos në viset kontinentale, por në viset bregdetare dhe mesdhetare ky front do të ndjehet shumë më pak dhe atje moti do të përmirësohet më shpejtë.
Pra, ata që janë në pushime nuk duhet të brengosen shumë ngase shumë shpejt do të pasojë përmirësimi i motit. Në Kosovë sonte priten reshje të reja kalimtare, ndërsa moti do të fillojë të përmirësohet nga e marta edhe pse mbetet freskët edhe të martën.
Nga e mërkura në tërë rajonin përmirësim substancial i motit dhe do të fillojë rritja e temperaturave edhe në viset kontinentale.
Të enjten pasdite nga veriu i Kontinentit mund të kemi edhe një front të dobët të ftohtë ajror. Ky front pritet të destabilizojë atmosferën përsëri duke kushtëzuar formimin e rrebeshe lokale të shiut me vetëtima dhe bubullimë kryesisht në Kosovë, Maqedoninë Veriore, Mal të Zi dhe disa vise malore të Shqipërisë. Ky front nuk do të duhej të kapte bregdetin sipas ecurive aktuale.
Nga e premta sërish përmirësim i motit dhe rritje e temperaturave. Sipas acurive aktuale sinoptike për fundjavë na pret mot me diell, stabil dhe me rritje të temperaturave në vlerat normale për këtë periudhë kohore. Nuk pritet vapë e madhe.
Ishte ky parashikimi i motit për këtë javë në Kosovë, Shqipëri dhe rajon. Nëse ka ndonjë ndryshim eventual do të njoftoheni në postimet tona të përditshme./METEOBALLKAN