Sot territori i Gjermanisë ka qenë arenë apo fushëbetejë mes temperaturave të ftohta polare dhe të ngrohta nga Atlantiku dhe Mesdheu dhe pikërisht për këtë arsye kemi mot shumë të trazuar atje dhe kjo po ndodhë më gjerë në Evropë por të sqaruar pak më lehtë po e përmendim Gjermaninë.
Veriu i Gjermanisë ka temperatura të ulëta, ndërsa jugu i Gjermanisë ende ka temperatura relativisht të larta, ndërkohë që nga Franca vjen një ciklon i fuqishëm që në pjesët qendrore të Gjermanisë sjellë reshje bore, ndërsa pak më në jug reshje shiu e të përziera. Në veri është më thatë dhe reshjet janë më sporadike.
Sistemi i reshjeve vjen nga Franca ose më mirë nga Atlantiku që dhe zhvendoset gradualisht drejtë jugut të Gjermanisë ku sonte ose nesër në mëngjes priten reshje të dendura bore.
Në këtë periudhë territoret tona do të jemi nën ndikimin e masave mjaft të ngrohta ajrore.
Ndërkohë që ajri i ftohtë përparon drejt jugut në Mesdhe krijohen ciklogjeneza që më në fund do të sjellin reshje bore në territoret tona. E para është në Iberi dhe e dyta në Apenine apo Itali që afër fundjavë bashkohen në një sistem dhe situata sinoptike është e përkryer për reshje bore në Kosovë, Shqipërinë kontinentale, Maqedoninë Veriore, Luginën e Preshevës dhe qendër e veri të Malit të Zi.
Pra, kësaj radhe kemi masa ciklonike në Mesdhe (Adritaik, Jon) që shtrihen deri në Detin e Zi në lindje. Reshje të dendura bore dhe stuhi të fuqishme bore do të përfshijnë edhe Bullgarinë, Rumaninë jugore dhe Greqinë veriore.
Kësaj radhe fjolla bore mund të ketë edhe në jug të Malit të Zi, gjegjësisht në Ulqin si dhe në viset bregdetare të Shqipërisë në veriperëndim të vendit. Mund të ndodhë që fjolla bore të ketë edhe në Tiranë mëngjesin e hershëm të së dieles.
Përndryshe reshje bore priten në tërë territorin e Republikës së Kosovës dhe Maqedonisë së Veriut. Kësaj radhe do të ketë shtresa bore edhe nëpër gati të gjitha ultësirat, ndërsa reshje intensive bore priten në gati të gjitha viset kodrinore-malore të territoreve tona. Reshjet mund të jenë të përcjellura edhe me erëra të fuqishme veriore e verilindore, prandaj mund të kemi stuhi të fuqishme bore në shumë zona kodrinore-malore.
Pra, i tërë ky sistem reshjesh e vranësirash nga Evropa po zhvendoset në drejtim të Ballkanit dhe kësaj radhe nuk ka ndonjë “pengesë anticiklonike” dhe pritet të kemi shi e pastaj edhe borë.
Me ardhjen e sistemit drejt Ballkanit në Evropë stabilizohet moti dhe ndalen reshjet. Kjo shënon krijimin e një anticikloni të fuqishëm në Evropë që në viset tona vjen pas reshjeve të borës dikur të shtunën pasdite ose të dielën.
Informacione tjera në postimet tona të ardhshme./MeteoBallkan
