Vala mjaft e fuqishme e nxehtësisë verore e kësaj vere 2024 është mjaft e gjatë dhe mjaft intensive, ndërsa mund të ndodhë që gjatë ditëve të ardhshme të thyhet ndonjë rekord edhe në territoret tona.
Në anën tjetër në Evropë vazhdojnë stuhitë e përditshme dhe temperatura paksa më të ulëta edhe pse është zagushi e madhe sidomos në zonat afër ndarjes kufitare mes ajrit shumë të nxehtë me origjinë nga Afrika veriore dhe ajri të freskët e jo-stabil që vjen nga Oqeani Atlantik.
Stuhitë e fuqishme nga frontet e Atlantikut në Evropë nganjëherë po arrijnë edhe në Ballkan sidomos në Slloveni dhe veri të Kroacisë, por pa mundur të depërtojnë më tujte drejt jugut dhe viseve tona për shkak të anticiklonit stabil dhe intensiv Afrikan. Sidoqoftë, një sasi e vogël e ajrit jo-stabil shkakton zhvillime sidomos në disa vise kodrinore- malore të viseve tona dhe kjo do të vazhdojë edhe ditëve të ardhshme, megjithatë panorama themelore dhe dominante do të jenë nxehtësia paksa ekstreme dhe thatësia.
Rrebeshe paksa më intensive kryesisht në viset kodrinore-malore dhe ndoshta edhe në ndonjë zonë të ulët presim të dielën pasdite, ndërsa temperaturat vazhdojnë të mbesin shumë të larta dhe mund të ulen vetëm në momentin e rrebeshit eventual.
Java e re fillon dhe vazhdon me temperatura shumë të larta. Zhvillimet e vranësirave mbesin të pakta dhe të izoluara.
Bazuar sipas ecurive aktuale sinoptike gjatë javës së re përkunder vapës esktreme do të fillojnë edhe instabilitetet atmosferike që megjithatë mbesin të izoluara deri në fund të javës duke u intensifikuar ngapak për çdo ditë
Destabilizim paksa më të theksuar të atmosferës me rrebeshe dhe breshër presim rreth datave 18 dhe 19 Korrik, kurse destabilizm masiv dhe freskim presim me 20 Korrik, me rrebeshe intensive shiu me vetëtima, bubullimë dhe breshër. Përkundër rrebesheve do të vazhdojë zagushia ngulfatëse. Rrebeshet e fuqishme do të jenë prezente kryesisht në viset kontinentale dhe më pak në viset bregdetare. Sipas të gjitha gjasave rrebeshet do të zgjasin dy ose tri ditë dhe pas tyre rikthehen temperaturat shumë të larta.
Meqenëse ky është një parashikim për një periudhë shumë të gjatë ndryshime pritet të ketë dhe për çdo ndryshim eventual do të njoftoheni në postimet tona të përditshme të cilat mund të jenë më të shpeshta këto ditë për shkak të valës ekstreme të të nxehtit veror./MeteoBallkan
