Një natë e ftohtë parashihet të jetë sidomos orëve të hershme të mëngjesit ku temperaturat në disa rajone kodrinore-malore do të zbresin deri në 1 gradë Celsius, madje në disa vise të larta malore mund të zbresin edhe më shumë.
Pas mëngjesit të ftohtë, dita e mërkurë vijon me diell dhe vranësira të pakta lokale. Temperaturat do të shënojnë rritje rapide, ndërsa vazhdojnë erërat e freskëta drejtimesh të ndryshme. Në mesdite temperaturat do të rriten dukeshëm nga 19 deri në 21 gradë Celsius.
Në Shqipëri, Maqedoninë Veriore, Luginë të Preshevës dhe Mal të Zi të Mërkurën pritet të mbajë mot me diell dhe vranësira të pakta lokale. Mëngjesi do të jetë mjaft i freskët e në disa zona edhe i ftohtë. Ka mundësi që në disa vise në Mal të Zi, (por edhe më gjerë në malet e larta) temperaturat të zbresë nën 0 gradë Celsius. Dita vijon e nxehtë dhe kryesisht stabile me temperatura mbi 20 gradë Celsius.
E Enjtja edhe më e nxehtë dhe stabile. Temperaturat do të shënojnë rritje të mëtutjeshme, por gjatë ditës në Shqipëri do të fillojë grumbullimi i vranësirave. Deri në orët e vonshme vranësira të dendura përfshijnë tërë rajonin. Në mbrëmje reshje shiu fillojnë në Shqipëri, pastaj gjatë natës reshjet e shiut do të shtrihen edhe në Kosovë, Maqedoninë Veriore, Mal të Zi dhe Luginë të Preshevës.
E Premtja ditë plotësisht e vranët dhe me reshje të shpeshta shiu. Temperaturat do të shënojnë ulje të ndjeshme, ndërsa në viset më të larta malore do të fillojnë reshje bore. Nganjëherë parashihen reshje intensive, ndërsa stuhi të fuqishme shiu me rrebeshe të fuqishme me bubullima mund të ketë në shumë pjesë të jugut të Shqipërisë.
Reshjet mund të vazhdojnë edhe mëngjesin e hershëm të së shtunës, pastaj do të pasojë përmirësimi gradual i motit, megjithatë edhe gjatë fundjavës mund të kemi reshje lokale afatshkurtra shiu përkundër përmirësimit të përgjithshëm të motit./MeteoBallkan
