Nën ndikimin e fushave të fuqishme ajrore anticiklonike ky Qershor po vazhdon të na sjellë mot të thatë dhe kryesisht stabil, megjithatë jo në të gjitha viset tona gjendja është tërësisht stabile. Gjatë pasdites së djeshme disa sisteme të izoluara sollën stuhi me breshër në disa zona në juglindje të Shqipërisë ku pati edhe breshër dhe dëme në vreshta dhe disa kultura tjera bujqësore.
Disa stuhi të izoluara mund të zhvillohen prapë në atë rajon sidomos që nga veriu i Greqisë, pastaj në hyrje të territorit Shqiptar në jug dhe juglindje të vendit, por mund të ndodhë edhe në disa zona në Maqedoninë Veriore aty afër. Këto zhvillime do të vijnë orëve të pasdites dhe kryesisht në viset kodrinore-malore.
Kosova është pak më larg këtyre zhvillimeve, megjithatë nuk përjashtohet tërësisht mundësia për ndonjë rrebesh të izoluar shiu me vetëtima dhe bubullimë, sidomos në rajonet kodrinore-malore afër Maqedonisë së Veriut.
Në viset tjera do të kemi stabilitet të plotë atmosferik me ndonjë përjashtim ose “surprizë” të rrallë.
Frontet e fuqishme të masave ajrore të Atlantikut që sjellin stuhi të fuqishme verore janë shumë larg territoreve tona dhe njëherë për njëherë nuk mund të depërtojnë për shkak të bllokadave të vazhdueshme antciklonike.
Masa të fuqishme ajrore anticiklonike do të vazhdojnë të mbretërojnë edhe gjatë ditëve të ardhshme, ndërkohë që me kalimin e ditëve mund të krijohen kushtet që jo-stabilitetet atmosferike të fillojnë të shtrihen gradualisht edhe në zonat tjera të viseve tona.
Destabilizim më të fuqishmëm të atmosferës mund të kemi nga datat 16 apo 17 Qershor, por kjo është vetëm një sinjal i cili nuk mund të merret si tërësisht i sigurt./MeteoBallkan
