Nesër në Kosovë pritet të mbajë mot i freskët, me vranësira e intervale kohore me diell. Rrallë në disa zona mund të ketë ndonjë rigë të dobët shiu e në malet e larta mund të paraqiten fjolla bore të dobëta.
Temperaturat tani janë vjeshtore dhe minimalja pritet të zbres deri në 4 gradë Celsius kurse maksimalja pritet të arrijë deri në 19 gradë Celsius.
Në Shqipëri, Maqedoninë e Veriut, Luginë të Preshevës dhe Mal të Zi nesër pritet të mbajë mot me diell e vranësira lokale. Në pjesën më të madhe të Shqipërisë do të ketë vetëm diell. Vranësira priten rrallë në disa vise malore të Shqipërisë e më shumë në pjesë të Maqedonisë së Veriut e në veri të Malit të Zi.
Në jug të Malit të Zi kryesisht me diell.
Të enjten (pas mëngjesit të ftohtë) në të gjitha viset tona pritet të kemi mot pak më të ngrohtë dhe më stabil. Temperaturat do të shënojnë rritje në të gjitha viset. Në Kosovë maksimalet nga 20 deri në 23 apo ndoshta edhe 24 gradë Celsius e në Shqipëri edhe më ngrohtë.
Të premten ndryshim i motit në të gjitha viset do të ketë shtim të vranësirave dhe reshje lokale shiu. Në Kosovë kryesisht shi e në Shqipëri vende-vende priten rrebeshe me vetëtima dhe bubullimë. Temperaturat do të shënojnë ulje në të gjitha viset për shkak të vranësirave e reshjeve lokale.
Fundjava vjen me stabilizim gradual të motit, megjithatë në disa rajone në lindje dhe në veri të rajonit tonë do të ketë më shumë vranësira e rrallëherë edhe ndonjë rigë e dobët shiu, por temperaturat do të shënojnë rritje në të gjitha viset e sidomos në pjesët perëndimore të Shqipërisë dhe po ashtu edhe Kosovës./MeteoBallkan
