Fronti i fuqishëm ajror që solli stuhi në Francë, Italinë veriore, Zvicerr, shumë pjesë të Gjermanisë etj. ka arritur të depërtojë edhe në Ballkan ku priten stuhi intensive me shi e breshër në Slloveni dhe pjesë të Kroacisë, ndërsa jo-stabilitete serioze atmosferike sonte pritet të zhvillohen edhe në disa pjesë të Bosnjës dhe Hercegovinës.
Këto zhvillime do të jenë mjaft të fuqishme për shkak të temperaturave të larta dhe kontakti me ajrin jo-stabil, por të gjitha do të jenë të karakterit lokal. Në viset tona edhe sot qetësi e plotë atmosferike, ndërsa nesër mund të fillojnë disa zhvillime të izoluara.
Ajri jo-stabil ka depërtuar edhe në brendësi të Italisë duke krijuar kushte për stuhi të fuqishme lokale.
Gjatë ditëve të ardhshme këto masa ajrore do të depërtojnë gradualisht edhe në viset tona, normalisht paksa më të dobëta dhe më në fund do të krijohen kushte për zhvillime të rrebesheve lokale të shiut me vetëtima dhe bubullimë, fillimisht në viset kodrinore-malore të Malit të Zi dhe Shqipërisë, pastaj edhe në Kosovë dhe Maqedoninë Veriore.
Këto zhvillime do të vijnë pas një Qershori jashtëzakonisht të thatë në viset tona dhe në përgjithësi në Ballkan.
Duhet të kemi para sysh se këto shira të lokalizuara që po vijnë nuk do të largojnë thatësinë esktreme, por megjithatë në disa zona mund të ketë rrebeshe mjaft intensive që sadopak do të zbusin dhe ndihmojnë me thatësinë esktreme, por mund të ndodhë edhe të bjerë breshër, për arsye se temperaturat e larta do të japin energji për zhvillime intensive konvektive apo vertikale.
Reshje nuk do të ketë në të gjitha viset tona, prandaj këto reshje do të jenë të karakterit lokal, apo do të ndodhin vende-vende.
Zhvillimet në viset tona do të fillojnë të martën pasdite krejtësisht të izoluara, ndërsa të Mërkurën dhe te Enjten, eventualisht edhe të Premten mund të jenë më të përhapura.
Informacione tjera në postimet tona të ardhshme./MeteoBallkan
