Zvillime të vola kanë filluar tani në disa rajone të Shqipërisë dhe aty-këtu në disa vise tjera ku ka edhe riga lokale shiu kryesisht në formë të rrebesheve të dobëta lokale.
Në vazhdim të ditës po presim zhvillime intensive konvektive dhe destabilizim mjaft të fuqishëm të atmosferës.
Me këtë nënkuptojmë dendësim të vranësirave dhe orëve të pasdites pritet të fillojnë rrebeshe lokale shiu me vetëtima dhe bubullimë. Siç e kemi theksuar mijëra herë këto zhvillime janë tipike verore dhe nuk kapin tërë territorin, prandaj rrebeshet do të jenë të karakterit lokal dhe në një rajon pritet të ndodhë stuhi e fuqishme me reshje dhe në rajonin tjetër jo shumë larg mund të ndodhë ndonjë rigë ose hiç fare.
Në disa raste këto reshje do të jenë të mirëseardhura dhe ato rajone që do të kenë fatin thatësia do të zbutet pak përkohësisht, por mund të ndodhë që në disa zona të krijohen edhe vranësirat e breshërit që janë “formacione të fuqishme konvektive” dhe të shpresojmë që të ketë vetëm shi apo rrebesh. Këto mund të shkaktojnë edhe dëme në kulturat bujqësore dhe dëmtime tjera eventuale.
Në përgjithësi përkundër destabilizimit të fuqishëm thatësia do të vazhdojë sepse këto reshje nuk do të kapin tërë territorin, ndërsa nga dita e Enjte pritet të jenë edhe më të izoluara dhe të kapin edhe më pak territor.
Pra, sot e Mërkurë orëve të pasdites eventualisht edhe mbrëmjes në shumë pjesë të Kosovës mund të ketë stuhi lokale me rrebeshe intensive shiu me vetëtima, bubullimë dhe mundësi për breshër.
Nga e Enjta rrebeshet do të jenë më të pakta dhe më shumë pritet të zhvendosen në viset kodrinore-malore të Shqipërisë dhe Maqedonisë së Veriut, megjithatë vende-vende priten edhe në Kosovë.
Temperaturat pritet të pësojnë ulje gjatë shtrëngatave eventuale, por mbetet ngrohtë, ndërsa pak më freskët për fundjavë në viset kontinentale./MeteoBallkan
