Masa më të freskëta ajrore nga Oqeani Atlantik do të depërtojnë në Francë sot duke ulur temperaturat dhe duke kushtëzuar rrebeshe të fuqishme, por të izoluara shiu me vetëtima dhe bubullimë. Vetëm jugu i Francës mbetet shumë i nxehtë, megjithatë nxehtësia verore rikthehet prapë edhe në viset tjera.
Edhe në Britaninë e Madhe kanë depërtuar masa më të freskëta me rrebeshe shiu, ndërkohë në Gjermani kemi vapën e fuqishme verore e cila pritet të pasohet nga stuhi të fuqishme shiu në jug dhe juglindje të vendit gjatë një apo dy ditëve të ardhshme. Pas vapës së madhe edhe Gjermania pritet të freskohet, por jo sot.
Ndërkohë vapa e madhe vazhdon në shumë pjesë të Spanjës, jug dhe qendër të Italisë dhe Ballkan ku pritet të fuqizohet. Veriu i Italisë pritet që çdo ditë të ketë kushte për krijimin e stuhive të fuqishme me vetëtima, bubullimë dhe breshër.
Në Ballkan vazhdon vapa dhe thatësia ekstreme, megjithatë ka sinjale se kjo vapë nuk do të zgjasë shumë sepse masa të freskëta ajrore do të depërtojnë edhe në Ballkan duke filluar nga 7 apo 8 Korriku, ndërsa me 9 Korrik edhe në viset tona. Është pikëpyetje nëse këto masa ajrore do të na sjellin reshje atmosferike apo flladi do të jetë i thatë. Kjo mbetet të shihet.
Përderisa në viset tona nuk kemi siguri se do të kemi reshje Sllovenia pritet të përfshihet dy apo tri herë nga rrebeshe intensive shiu me vetëtima dhe bubullimë gjatë ditëve të ardhshme, ndërsa rrebeshe priten edhe në disa pjesë të Kroacisë, Bosnjës dhe Hercegovinës dhe më pak në Mal të Zi, Serbi dhe territoret tona.
Stuhitë më të fuqishme do të ndodhin në veriun e Italisë, pjesë të Zvicres, jug dhe juglindje të Gjermanisë veri të Austrisë, pastaj edhe në Slloveni. Për më shumë përditësime të gjendjes sinoptike duhet të presim por një është e sigurte se do të kemi edhe disa ditë pa ndonjë shans për freskim apo reshje atmosferike, përpos disa viseve malore në juglindje të Shqipërisë ku mund të ketë rrebeshe afatshkurtra shiu.
Informacione tjera në ditët e ardhshme më shumë detaje, ndërsa deri atëherë përgatituni për fuqizimin e vapës verore./MeteoBallkan
