Një turist nga Italia, Omar Farang Zin (48), vdiq dje në Rumani pasi u sulmua dhe u vra nga një ari i murrmë. Sulmi ndodhi ndërsa italiani po udhëtonte me motoçikletë në rrugën Transfăgărăşan, pranë digës Vidraru në Qarkun Argeş.
Një ditë para tragjedisë, Zin postoi në profilin e tij në Facebook disa foto dhe video të arinjve që hasi përgjatë rrugës, përfshirë një selfie me një ari të murrmë.
Besohet se ai iu afrua një ariu femër me tre këlyshë për t’u bërë një foto, gjë që çoi në sulm.
Pasi shqyrtoi fotot në celularin e tij, u konfirmua se Zin zbriti nga motoçikleta dhe u përpoq ta filmonte arushën me këlyshët e saj nga një distancë shumë e afërt – një sjellje që konsiderohet jashtëzakonisht e rrezikshme.
Fotot e fundit të bëra me celular u publikuan nga portali rumun Observator .
Sipas burimeve jozyrtare, ariu fillimisht e plagosi motoçiklistin dhe më pas e zvarriti rreth 60 metra poshtë shpatit. Xhandarët dhe shërbimi i shpëtimit malor nga Arges ndërhynë dhe ariu u qëllua në fund, sipas mediave rumune.
Në trupin e viktimës u gjetën plagë të shumta nga kafshimi. Ekipet e shpëtimit arritën ta nxirrnin trupin nga terreni i vështirë dhe ta transferonin atë në mjekësinë ligjore për një autopsi dhe përcaktimin e shkakut të saktë të vdekjes. Në vendin e sulmit u gjetën gjurmë gjaku, pjesë të pajisjeve të viktimës dhe doreza.
Në të njëjtën zonë, në fund të majit, arinjtë plagosën një polak dhe një grua spanjolle në dy incidente të ndara.
