Sot në Kosovë pritet të mbajë mot kryesisht me diell dhe shumë i nxehtë veror. Erërat jugperëndimore do të fillojnë të fuqizohen. Temperaturat pritet të jenë mjaft të larta dhe pritet të luhaten nga 17 ajo minimale deri në 37 gradë Celsius ajo maksimale.
Në Shqipëri, Maqedoninë Veriore, Luginë të Preshevës dhe Mal të Zi pritet të mbajë mot me diell dhe shumë i nxehtë veror. Do të ketë fuqizim gradual të erërave jugore, jugperëndimore dhe perëndimore. Pasdite në disa zona të izoluara në Mal të Zi dhe thellë në veri të Shqipërisë mund të ketë zhvillime të vranësirave vertikale me ndonjë rrebesh të izoluar shiu me vetëtima dhe bubullimë.
Temperaturat deri në 40 gradë Celsius në vendet më të nxehta.
Të Martën fillon ndryshimi gradual i motit. Erërat e fuqishme jugperëndimore do të vazhdojnë herë pas here me intensitet të lartë. Në Mal të Zi dhe gjysmën veriore të Shqipërisë priten dukshëm më shumë vranësira dhe rrebeshe shiu me vetëtima dhe bubullimë.
Vende-vende mund të ketë rrebeshe intensive duke përfshirë edhe bregdetin shqiptar në veri, afërsisht që nga Durrësi në Velipojë dhe Ulqin mund të ketë ndonjë shtrëngatë të fuqishme lokale. Në gjysmën jugore të Shqipërisë vazhdon mot kryesisht me diell dhe i thatë.
Ndryshimi i motit të Martën do të fillojë edhe në Kosovë ku pritet mot me diell dhe vranësira të cilat do të kushtëzojnë rrebeshe lokale shiu me vetëtima dhe bubullimë. Rrebeshet nuk pritet të zgjasin shumë. Temperaturat do të fillojnë të ulen.
Në Maqedoninë Veriore edhe dita e Martë do të jetë shumë e nxehtë dhe kryesisht me diell, por me mundësi për disa zhvillime të izoluara.
Të Mërkurën ulje të ndjeshme të temperaturave dhe reshje lokale shiu, pak më intensive në veri të Kosovës dhe Dukagjin. Në Maqedoninë Veriore dhe pjesën më të madhe të Shqipërisë kryesisht thatë por më freskët. Ndonjë rrebesh pritet në veri- verilindje dhe lindje të Shqipërisë. Ulja e temperaturat do të jetë e theksuar sidomos në Kosovë, veri të Shqipërisë dhe veri të Malit të Zi./MeteoBallkan
