Kjo javë pritet të shënojë fundin e valës së fortë të nxehtësisë në territoret tona për shkak të avancimit të masave të freskëta ajrore nga Evropa në Ballkan dhe më thellë në juglindje.
E Hëna po karakterizohet me mot shumë të nxehtë sepse ende jemi nën ndikimin e masave shumë të nxehta ajrore dhe njëkohësisht sot gjatë ditës do të fillojnë të fryjnë erëra më të fuqishme nga jugperëndimi.
Të Martën do të vërehet destabilizimi gradual i motit. Përpos erërave vende-vende të fuqishme do të ketë edhe shtim të vranësirave, por jo në të gjitha viset. Vranësirat pritet të shtohen në veri të Shqipërisë dhe Mal të Zi si dhe në disa rajone të Republikës së Kosovës, ndërkohë që vazhdon vapa e madhe në Maqedoninë Veriore dhe jug të Shqipërisë. Rrebeshe më intensive priten në Mal të Zi dhe veri të Shqipërisë duke përfshirë edhe bregdetin verior shqiptar. Në Kosovë priten zhvillime të rrebesheve të izoluara të shiut me vetëtima dhe bubullimë, pra nuk priten rrebeshe në të gjitha viset dhe ato nuk do të zgjasin shumë edhe në ato zona ku zhvillohen. Erërat pritet të jenë mjaft të fuqishme në disa rajone, por pa ndonjë ekstrem të madh.
E Mërkura shënon fundin definitiv të valës së nxehtësisë me vranësira të dendura (në Kosovë) dhe reshje lokale shiu. Rrebeshe shiu priten në Kosovë, Mal të Zi dhe disa pjesë të Shqipërisë. Këto rrebeshe do të jenë jashtëzakonisht të mirëseardhura edhe pse shumë vështirë që do të kenë ndonjë impakt të rëndësishëm në zbutjen e thatësisë së madhe.
Temperaturat do të shënojnë ulje të ndjeshme sidomos në Kosovë dhe viset kontinentale të rajonit. Vetëm në Maqedoninë Veriore mbetet më nxehtë, por edhe atje përfundon vapa e madhe.
Nga e Enjtja vjen stabilizim i atmosferës por vazhdon mot ende i freskët dhe fluksi i ajrit më të freskët nga Skandinavia. Priten vranësira dhe shumë intervale kohore me diell. Vranësirat do të vijnë duke u rralluar. Nuk përjashtohet mundësia për ndonjë rigë ose rrebesh të izoluar shiu.
Përmirësim i dukshëm i motit në fundjavë me më shumë diell dhe më pak vranësira, ndërsa edhe temperaturat shënojnë rritje të ndjeshme sidomos të Dielën.
Pra, një javë më dinamike, me freskim të ndjeshëm të motit dhe reshje lokale. Reshjet nuk do të jenë të mëdha me ndonjë përjashtim. Reshje shumë shumë të pakta në Maqedoni dhe jug të Shqipërisë. Edhe në viset tjera reshjet do të jenë të karakterit lokal. Më së shumti reshje priten në veri të Shqipërisë dhe ndoshta edhe në disa zona të Kosovës.
Mesjava shumë e freskët, ndërsa fundjava më e ngrohtë dhe me mundësi për reshje të pakta dhe të izoluara.
Ishte ky parashikimi javor i motit. Ndryshime të vogla mund të ketë dhe për çdo ndryshim eventual do të njoftohene në postimet tona të përditshme./MeteoBallkan
