Të Shtunën në Kosovë pritet të kemi mot stabil, me diell dhe të nxehtë. Vranësirat parashihet të jenë të pakta dhe lokale. Temperaturat do të shënojnë rritje dhe pritet të lëvizin nga 13 minimalet deri në 30 apo 31 gradë Celsius ato maksimale.
Në Shqipëri, Maqedoninë e Veriut, Luginë të Preshevës dhe Mal të Zi të shtunën pritet të mbajë mot kryesisht me diell dhe i nxehtë. Vranësirat do të jenë prezente në disa vise malore ku mund të ketë ndonjë rigë të dobët shiu.
Të Dielën do të vazhdojë moti i nxehtë, por pritet të ketë shtim lokal të vranësirave dhe zhvillime lokale të tyre duke kushtëzuar rrebeshe të izoluara shiu me vetëtima dhe bubullimë. Vonë në mbrëmje destabilizim i fuqishëm i motit dhe depërtimi i frontit të fuqishëm të ftohtë ajror. Si pasojë priten rrebeshe lokale shiu me vetëtima dhe bubullimë dhe mund të ketë stuhi të fuqishme lokale.
Kësaj radhe (gjatë natës) temperaturat do të shënojnë ulje të ndjeshme.
Të Hënën na pret mot me vranësira e intervale kohore me diell. Do të jetë dukshëm më freskët se ditët paraprake sidomos në Kosovë ku priten më shumë vranësira dhe ndonjë reshje lokale./MeteoBallkan
