Pas një dite shumë të nxehtë në Kosovë dhe rajon radhën e ka një fronti i ftohtë ajror i cili do të shkaktojë ulje të temperaturave.
Gjatë natës në Kosovë do të fillojnë të fryjnë erëra nga veriu e verilindja të cilat gradualisht do të fuqizohen dhe po ashtu do të ketë shtim gradual të vranësirave. Orëve të mëngjesit vende-vende mund të ketë edhe ndonjë rigë ose rrebesh lokal shiu dhe erërat veriore do të ndjehen dukshëm më të freskëta.
Fronti i ftohtë do të ndikojë në Kosovë dhe pastaj lokalisht në Maqedoninë Veriore, Shqipërinë kontinentale dhe më shumë në veri të Malit të Zi dhe Luginë të Preshevës, por reshjet do të jenë të pakta dhe atë vetëm në disa zona të Kosovës dhe rrallë shumë rrallë në ndonjë vend tjetër të rajonit.
Në perëndim të Shqipërisë fronti nuk do të ndjehet pothuajse fare ose shumë pak, ndërsa në veriperëndim të Shqipërisë do të ketë fuqizim të erërave verilindore, por temperaturat ulen vetëm vetëm pak.
Ulja e temperaturave do të jetë e theksuar vetëm në Kosovë dhe disa vise tjera kontinentale të rajonit. Pas reshjeve të dobëta dhe lokale vranësirat do të fillojnë të shpërndahen dhe gjatë ditës së mërkurë në Kosovë priten edhe vranësira edhe intervale kohore me diell dhe siç theksuam ndonjë reshje vetëm në mëngjes dhe atë në veri dhe verilindje të vendit. Mund të ndodhë ndonjë rrebesh ose rigë e dobët edhe paradite në disa zona.
E Enjtja sjellë diell dhe vranësira lokale si dhe temperatura jo aq të larta për shkak të vazhdimit të erërave të freskëta nga veriu e verilindja.
Të Premten përmirësim dhe rritje graduale e temperaturave që është hyrje për një fundjavë të nxehtë dhe stabile./MeteoBallkan
