Pjesa e parë e kësaj jave do të vazhdojë me kushte të njëjta atmosferike, pra me diell, shumë nxehtë dhe me thatësi persistente, megjithatë në pjesën e dytë të javës duke shkuar kah fundjava ka shenja serioze se gjendja sinoptike mund të ndryshojë.
Nga e hëna deri të Enjten do të jemi nën ndikimin e plotë të masave të anticiklonike të thata dhe pa ndonjë gjasë për reshje atmosferike. Po ashtu edhe temperaturat do të jenë mjaft të larta mbi 30 gradë Celsius në gati të gjitha viset tona, normalisht në zonat më të nxehta.
Temperaturat do të fillojnë të zbresin lehtë të Mërkurën, kurse të Enjten do të ndjehet pak më freskët dhe priten edhe vranësira lokale dhe ndonjë rrebesh apo stuhi e izoluar shiu. Kjo do të jetë një hyrje se masat ajrore më dinamike dhe më të lagështa mund të depërtojnë në viset tona.
Situata sinoptike bëhet më interesante në fundjavë me një ciklon dukshëm më të fuqishëm në Mesdhe që mund të sjellë reshje shiu gjerësisht në territorin e Shqipërisë, por edhe në Kosovë dhe Maqedoninë Veriore.
Pasi që fundjava është pak larg dhe çdo devijim edhe më i vogël i ciklonit mund të ndryshojë sasinë e reshjeve, por bazuar sipas ecurive aktuale sinoptike do të kemi disa periudha me shi që do të ndikojnë jashtëzakonisht volitshëm duke zbutur sadopak gjendjen e rëndë për shkak të thatësisë.
Me evoluimin e gjendjes sinoptike modelet do të jenë më të “menqura” gjatë ditëve të ardhshme, por shenjat janë të mira dhe serioze për reshje shiu në fundjavë.
Ne si MeteoBallkan do të jemi duke përcjellur gjendjen sinoptike dhe me padurim presim të japim lajmin që e presim të gjithë për reshje atmosferike, por duhet të presim edhe pak që të jemi të sigurtë.
Sidoqoftë, të theksojmë edhe njëherë; java ka filluar shumë e nxehtë dhe nxehtësia vazhdon deri afër fundjavës. Reshje të izoluara mund të paraqiten nga e Enjta dhe temperaturat do të fillojnë të zbresin gradualisht. Për fundjavë ulje më e madhe e temperaturave dhe mundësi për reshje më solide shiu.
Ky ishte parashikimi i motit për këtë javë nga MeteoBallkan. Ndryshime në parashikim padyshim se do të ketë dhe si do të jetë tranzicioni sinoptik nga vera në vjeshtë kjo mbetet ende të shihet me afrimin e fundjavës./MeteoBallkan
