Pas një vere shumë të gjatë dhe të nxehtë, temperaturat kanë pësuar ulje të ndjeshme dhe këto u përcollën me vranësira e reshje shiu të cilat ende janë të pakta.
Ulja e temperaturave do të jetë edhe më e theksuar gjatë kësaj jave sidomos nga mesjava e tutje kur kemi ciklonin e paralajmëruar ditë më pare, reshjet atmosferike që vijnë nga Mesdheu dhe masat e ftohta ajrore direkt nga Rusia që do “mbushin” malet tona me borë.
Java ka filluar e vranët dhe e ftohtë, por reshjet do të ketë shumë të pakta dy ose tri ditët e para të javës dhe atë vetëm në disa zona të izoluara.
Moti përmirësohet pak të Martën ku pritet të kemi një rritje të lehtë të temperaturave dhe intervale kohore me diell. Intervale kohore me diell lokalisht pritet të kemi edhe sot (e hënë) pasdite.
Të Martën pritet të kemi mot stabil dhe kryesisht me diell, ndërsa periudha me diell do të kemi edhe të mërkurën paradite dhe ndoshta edhe në mesditë. Pasditen e së mërkurës pritet të vijnë vranësira të reja dhe temperaturat do të zbresin menjëherë me erëra të ftohta nga veriu. Kjo do të jetë shenjë e afrimit të ciklonit të fuqishëm dhe fillim i depërtimit të masave mjaft të ftohta ajrore që vijnë direkt nga Rusia.
Pasdite vonë ose në mbrëmje do të fillojnë edhe reshje shiu, ndërsa në malet e larta të Kosovës do të fillojnë reshjet e para të borës.
Dita e enjte vjen e ftohtë, me vranësira të dendura, reshje shiu vende-vende intensive dhe reshje bore në viset malore. Reshje bore mund të ketë edhe në disa kodrina. Në veri të Malit të Zi borë mund të ketë edhe në zonat e ulëta.
Me kalimin nga e enjtja në të premten në Kosovë reshjet vazhdojnë me intensitet të ndryshueshëm dhe përderisa temperaturat ulen edhe bora zbret më poshtë. Sipas modeleve të tanishme që shkojnë pak në ekstrem reshje bore në shumë zona në Kosovë priten edhe në viset kodrinore-malore, por edhe në disa ultësira të Rrafshit të Kosovës dhe kjo mund të jetë bora më e hershme për shumë shumë vite e dekada. Megjithatë kjo ende mund të ndryshojë. Temperaturat do të pësojnë ulje të mëtutjeshme dhe në viset malore do të zbresin disa gradë nën 0.
Edhe pse është herët të konkludohet me saktësi, por modelet janë më se të përcaktuara se në Kosovë priten reshjet e para të shqotës apo edhe dëborës mëngjesin e së Premtes edhe në disa zona të ulëta sidomos në Rrafshin e Kosovës. Kjo mbetet ende për tu ndjekur dhe për tu konfirmuar.
Sipas ecurive aktuale sinoptike përmirësim të motit do të kemi nga e diela.
Pra, një javë e ftohtë sidomos nga e Entja me reshje të dendura atmosferike. Këto reshje mund të zgjasin dy ditë dhe do të ndikojnë jashtëzakonisht mirë në përmirësimin e situates hidrologjike në Kosovë.
Reshje të dendura shiu e bore në viset malore priten edhe në Shqipëri dhe Maqedoninë Veriore. Reshje bore priten në veri, verilindje dhe lindje të Shqipërisë.
Pasi kemi këtë gjendje shumë interesante meteorologjike dhe mundësinë e borës së pare gjatë javës do të mundohemi të jemi më aktiv./MeteoBallkan
