Gjatë natës pritet që reshjet e shiut nga Shqipëria dhe Mali u Zi të përfshijnë edhe Kosovën, fillimisht rajonin e Dukagjinit, pastaj deri në mëngjes edhe viset tjera.
E mërkura në Kosovë pritet të karakterizohet me vranësira të dendura dhe reshje e rrebeshe të herëpashershme shiu me pak mundësi edhe për ndonjë vetëtimë dhe bubullimë. Temperaturat pritet të luhaten nga 6 ajo minimale deri në 11 gradë Celsius ajo maksimale. Borë vetëm në malet më të larta.
Në Shqipëri, Maqedoninë Veriore, Luginë të Preshevës dhe Mal të Zi të mërkurën pritet të mbajë mot plotësisht i vranët dhe me reshje të shpeshta shiu. Vende-vende priten reshje dhe rrebeshe të dendura shiu.
Të enjten në Kosovë priten ulje të ndjeshme të temperaturave sepse do të fillojnë të fryjnë erëra të ftohta nga veriu dhe verilindja. Si pasojë pas ndërprerjes së përkohshme të reshjeve ato pritet të rifillojnë dhe orëve të vonshme të pasdite apo mbrëmjes do të përzihen edhe me borë edhe në shumë zona të ulëta të vendit.
Reshje shiu të enjten priten edhe në Shqipëri dhe më vonë në veri dhe verilindje të vendit do të fillojnë reshje bore.
Shi të enjten pritet edhe në Maqedoninë Veriore dhe Luginë të Preshevës, por borë vetëm në viset kodrinore-malore dhe rrallë në ndonjë zonë mesatare. Në veri të Malit të Zi priten reshje të dendura bore.
Edhe dita e Premte do të jetë e ftohtë me reshje lokale shiu, shqote e bore dhe po ashtu në shumë zona të Kosovës mund të ketë edhe shi të ngrirë./MeteoBallkan
