Gadishulli Ballkanik do të goditet nga një valë e re e të ftohtit Siberik këtë fundjavë. Në disa rajone priten edhe reshje të dendura bore si në Rumani, Bullgari, Greqi dhe Turqi. Në Kosovë dhe Maqedoni priten reshje më të pakta. Gjithashtu edhe në Shqipëri nuk priten reshje të mëdha, vetëm reshje sporadike. Por Shqipëria do të ketë erëra të fuqishme verilindore dhe lindore.
Temperaturat do të pësojnë ulje të theksuar dhe në foto mund të shihni se në Rumani temperatura minimale natën mes së shtunës dhe së dielës do të ulet deri në minus 18 gradë celsius. Sa i përket Kosovës dhe Maqedonisë temperatura minimale do të ulet deri në minus 15 gradë celsius në viset malore. Pak më butë do të jetë në viset e ulëta, megjithatë ndjesia subjektive e të ftohtit do të jetë e fortë për shkakë të erërave të ftohta veriore dhe verilindore.
Informacione tjera rreth evoluimit të goditjes më të re Siberike në rajonin tonë në fundjavë në postimet tona të ardhshme./Meteoballkan
