Dje Kosova ishte përfshirë nga erëra të fuqishme juglindore, megjithatë munguan reshjet atmosferike. Reshje pati vetëm lokalisht dhe me intensitet kryesisht të dobët.
Ngjashëm do të jetë edhe sot, por erërat do të jenë më të dobëta se ditën e djeshme. Reshje atmosferike nuk priten edhe sot me ndonjë përjashtim të vogël.
Nga dita e nesërme rriten gjasat për reshje atmosferike. Fillimisht në territorin e Shqipërisë priten rrebeshe lokale shiu. Gjatë natës në të hënën në Shqipëri priten rrebeshe të fuqishme shiu me vetëtima dhe bubullimë, posaqërisht në jug dhe jugperëndim të vendit. Reshje më të dobëta do të përfshijnë edhe Maqedoninë e Veriut dhe lokalisht edhe Kosovën. Reshje të fuqishme priten edhe në Mal të Zi.
Nga e hëna i tërë rajoni ynë duke përfshirë edhe Kosovën do të jemi nën ndikimin e masave të lagshta ajrore ciklonike. Herë pas here priten edhe reshje shiu, vende-vende edhe rrebeshe të fuqishme shiu me vetëtima dhe bubullimë. Reshjet edhe pse me pak vonesë po i presim të gjithë me padurim dhe besojmë se të gjithë do të ndahemi të kënaqur./Meteoballkan
