Gjatë tërë kësaj jave do të jemi nën ndikimin e masave ajrore të lagështa ciklonike që vijnë nga Atlantiku dhe Mesdheu. Reshjet e shiut të cilat filluan sot dhe ndaluan do të rigjenerohen prape gjatë natës. Pra sonte gjatë natës priten reshje të dendura shiu.
Nesër në Kosovë gjithashtu priten reshje të dendura shiu duke përfshirë edhe mëngjesin dhe ditën. Mot i ngjashëm pritet edhe në Shqipëri, Maqedoninë e Veriut dhe Mal të Zi vetëm se në këto vende reshjet do të jenë më të pakta.
Të mërkurën në tërë rajonin do të kemi mot jostabil. Pas një paraditeje kryesisht të thatë ( me ndonjë rigë lokale shiu), gjatë ditës dhe pasdite priten zhvillime të vranësirva konvektive të cilat do të sjellin rrebeshe lokale shiu me vetëtima dhe bubullimë.
Të enjtën mund të kemi një pauzë të reshjeve atmosferike, mirëpo atmosfera nuk do të jetë tërësisht stabile dhe nga Mesdheu do të kemi një vorbullë të re ciklonike e cila do të përfshijë rajonin tonë ditën e premte dhe e cila do të na sjellë përsëri reshje atmosferike të cilat vende-vende do të jenë të dendura.
Edhe gjatë fundjavës që po vije do të jemi nën ndikimin e masave ajrore ciklonike dhe priten reshje të mëtutjeshme atmosferike./Meteoballkan
