Pas një kohe mjaft të gjatë me dominim gati të plotë anticiklonik dhe thatësie ekstreme jemi shumë afër ndryshimit substancial të motit. Mesdheu po “vlon” për një kohë të gjatë nga masat ajrore ciklonike të cilat nuk “arrinin” të largonin barrierën anticiklonike nga rajoni ynë, por tanimë anticikloni është dobësuar plotësisht dhe është larguar. Masat e lagshta ajrore dhe vranësirat nga Mesdheu do të vijnë pa asnjë pengesë drejt rajonit tonë.
Tanimë përtej Italisë kemi vorbullen gjigande ciklonike e cila pritet të sjellë porcionin e parë të reshjeve të shiut sonte dhe nesër. Në Shqipëri priten reshje mjaft intensive dhe rrebeshe lokalisht të fuqishme shiu me vetëtima dhe bubullimë. Në viset e larta malore në Shqipëri, Maqedoninë Veriore dhe Kosovë priten reshje shqote dhe bore.
Cikloni pritet të fuqizohet në veri të Italisë dhe të depërtojë thellë në Kontientin evropian duke kushtëzuar përkeqësim të motit në shumë pjesë të Evropes dhe Ballkanit dhe duke krijuar masa gjigande ciklonike në Kontinent.
Njëkohësisht masa të reja ciklonike nga Atlantiku verior depërtojnë mes Skandinavis dhe Britanisë së Madhe në drejtim të Evropes dhe Mesdheut duke fuqizuar edhe më tujte këto masa jo-stabile ajrore.
Fillimisht rajoni ynë do të ndodhet në sektorin e ngrohtë të këtyre masave ajrore që sjellin reshje të herëpashershme shiu, ndërsa ajri i ftohtë depërton në Evropë. Pas disa ditëve ajri i ftohtë pritet të arrijë edhe te ne duke kushtëzuar ulje të ndjeshme të temperaturave dhe goditjen e parë serioze polare për këtë sezonë dimërore.
Reshje shumë intensive priten në disa pjesë të Shqipërisë ku vërshimet e shpejta do të jenë të pashmangshme. Reshje intensive mund të ketë edhe në Dukagjin.
Pas reshjeve të shiut me uljen e temperaturave priten edhe reshjet e para të borës nëpër shumë ultësira të rajonit tonë që priten gjatë javës së re.
Pas kalimit të frontit të parë të ftohtë me reshje kalimtare bore gjat javës tjetër priten rritje të përkohshme të temperaturave të cilat pastaj pritet të pësojnë ulje të sërishme me ardhjen e fronteve të reja në kuadër të këtyre cikloneve të fuqishme që pritet të mbrëthejnë Mesdheun dhe Evropën.
Para nesh një periudhë mjaft dinamike meteorologjike dhe pritet të jetë jashtëzakonisht interesante evoluimi i gjendjes sinoptike gjatë ditëve të ardhshme dhe sigurisht ne do tju lajmërojmë me postime gjatë ditëve të ardhshme./MeteoBallkan