Me rritjen e temperaturave që vijnë nga Mesdheu dhe Afrika Veriore, njëkohësisht kemi edhe masa ajrore të lagshta ciklonike nga Atlantiku i largët që herë pas here pritet të na sjellin reshje shiu. Temperaturat po rriten vrullshëm sa që pritet edhe shkrirja e borës edhe në viset malore afërsisht deri 1400 metra lartësi mbidetare.
Rrymimet e ngrohta ajrore nga jugu nuk janë të pazakonta në këtë kohë madje kohëve të fundit janë për trend.
Reshjet më të dendura të shiut ditëve të ardhshme priten në veri të Shqipërisë dhe po ashtu edhe në jug dhe jugperëndim të vendit ku herë pas here priten shtrëngata shiu me vetëtima dhe bubullimë. Në viset tjera reshjet do të jenë më të rralla në fillim, por pas disa ditëve priten reshje shiu në gati tërë territorin e Shqipërisë. Reshje të fuqishme shiu priten në Mal të Zi siç ndodh rëndom.
Në Kosovë nuk priten reshje shumë të dendura, por të theksojmë se përpos reshjeve sporadike të shiut Kosoven e presin edhe intervale të gjata kohore me mot të këndshëm dhe stabil, ngase lagështia nga deti nuk pritet të arrijë në tërë territorin e Kosovës, madje në lindje të vendit mund të mos ketë fare reshje shiu ose ndonjë rigë sporadike afatshkurtër. Reshje pak më signifikante priten në rajonin e Dukagjinit sidomos në territoret e Pejës, Junikut, Deçanit, dhe Gjakovës. Reshje shiu më pak intensive priten në Drenicë dhe veri të vendit. Më së paku reshje shiu priten në lindje të vendit dhe rajonin e Prishtinës dhe Fushë Kosovës, sidoqoftë Kosova është territor shumë i vogël dhe çdo ndryshim edhe më i vogël i masave ajrore ciklonike mund të ndryshojë edhe sasinë dhe distribuimin e reshjeve atmosferike, por për momentin këto janë parashikimet./MeteoBallkan
