Masa mjaft intensive ciklonike me origjinë nga Oqeani Atlantik kanë gjetur rrugën që përmes Evropes të arrijnë deri në Alpe dhe pastaj në Detin Adriatik e në Ballkan duke kushtëzuar destabilizim mjaft të fuqishëm të motit.
Atmosfera nga e hëna do të jenë jashtëzakonisht dinamike nën ndikimin e këtyre masave masive ajrore të paqëndrueshme.
Në shumë vise të Ballkanit do të fillojnë reshje shiu të cilat në disa rajone do të shndërrohen menjëherë në reshje të dendura bore dhe kjo vlenë fillimisht vetëm për Slloveninë dhe veriun e Kroacisë. Në viset tjera njëherë për njëherë do të dominojnë masa të ngrohta ajrore me origjinë nga Afrika Veriore dhe Mesdheu dhe reshjet do të jenë në formë shiu, përpos viseve të larta malore që fillimisht mund të kenë reshje të dendura bore, por të cilat për shkak të rrymimeve të fuqishme të ngrohta ajrore gjatë javës do të shndërrohen në reshje shiu.
Reshjet e shiut do të jenë të shpeshta gjatë ditëve të ardhshme dhe shumë më intensive në pjesë të Dukagjinit si në zonat e Pejës, Istogut, Junikut, Deçanit, Gjakovës etj. Edhe në viset tjera herë pas here priten reshje shiu, por fillimisht shumë më të pakta.
Reshje shumë të fuqishme po ashtu priten edhe në Mal të Zi dhe veri të Shqipërisë, lokalisht edhe në shumë zona tjera të Shqipërisë.
Temperaturat do të shënojnë rritje për shkak të rrymimeve shumë të fuqishme ajrore nga jugu, jugperëndimi dhe juglindja, ndërsa me kalimin e ditëve reshjet do të përfshijnë të gjitha territoret tona.
Pra, disa ditë do të kemi erëra jugore, reshje lokalisht intensive shiu, ndërsa pas disa ditëve me uljen e temperaturave do të kemi gjasa të mira edhe për reshje bore.
Informacione dhe detaje të reja në postimet tona të ardhshme./MeteoBallkan
